Carito Inyiak

Arya Fernandes paja ketek jolong gadang pulang kampuang basamo ayahnyo mancaliak kampuang nan kanai hoyak dek gampo. Dek lai nasib kamujua rumah gadang ayahnyo lai ndak roboh doh. Dirumah gadang tun badiam abak jo mandeh ayahnyo. Katiko sampai di kampuang arya fernandes nan baru bisa bahaso minang itu batanyolah ka inyiaknyo:

“Nyiak..baa mangko dek batubi tubi bana bancano di kampuang kito. Partamo ustano pagaruyuang nan tabaka sasudah itu dioyak gampo pulo”.

Inyiak nan sadiang maisok rokok Dji It itu langsuang barubah rono mukonyo nan tadinyo cerah dek anak jo cucu tibo kini langsuang muram dan matonyo manarawang. Ndak lamo sudah itu inyiak manguok gadang gadang, Arya nan mancaliak gigi inyiak nyo lah ndak ado langsuang galak lo gadang gadang tapi capek nyo antian takuik inyiak nyo marabo.

“Apo nan ang galak an ! lai tau ang bancano iko adolah hasia karajo urang cadiak pandai”. Kecek inyiak sambia mamatikan rokok Dji It di asbak nan tabuek dari tampuruang karambia jantan.

“Ha..baa dek baitu nyiak…urang cadiak pandai baa lo tuh”.

“Iyo cadiak pandai..urang urang nan maraso nyo cadiak surang jo pandai surang nyo bao lalu se urang sa ranah ko,” tampak muko inyiak sabana sirah dan matonyo cando kabau nio baradu. Berang bana tampaknyo inyiak. Arya dek penasaran taruih mangaja cito inyiak tu.

“Caritoan nyiak bia ngarati lo arya..”

Sambia mambaiki duduaknyo inyiak mulai lah bacarito. “Lai tau ang urang cadiak pandai nan maraso anyo lah manjadi panguasao alam Minangkabau ko alah mampamalukan katurunan Rajo Alam Pagaruyuang. Cubo ang caliak lah bara gala gala nan dibagikan dek urang nan maraso cadiak jo pandai tu ka urang nan ndak ado hubungan darah jo Rajo Pagaruyuang. Tarakhir SBY diagiah gala Yang dipertuan maharajo Pamuncak Sari Alam. Caliak dek ang galanyo sajo maharajo nan indak ado diateh itu lai. Rajo Adityawarman sajo ndak bagala sasantiang itu doh. Caliak dek ang bini nyoh mandapek gala loh Puan Puti Ambun Suri. Coba ang pikiakan nan berhak mandapek gala rajo ko kan keturunan Bundo Kanduang sajo masak ka urang Jawi diagiah gala nan paliang tinggi.” Inyiak bacarito sampai ongoknyo sasak tampak bana berang inyiak ka bakeh cadiak pandai nan disabuiknyo tuh.

“Ntu apo lo hubungan maagiah agiah gala tuh jo tabaka nyo ustano jo gampo nyiak ?” asrya tambah penasaran dek cito inyiaknyo.

Inyiak nan angoknyo lah normal baliak manaruihkan cito nyoh. “lai tau ang carito cindua mato ?”, tanyonyo ka Arya.

“Lai nyiak” sahuik arya. “Kok lah mambaco tantu waang tau baraso cindua mato punyo kudo nan banamo gumarang jo kabau binuang. Kaduao binatang ko sati bana. Nan gumarang bisa tabang nan binuang ko di talingonyo basarang labah dan tanduaknyo sabana panjang. Kaduo binatang ko manuruik carito masih iduik. Nan gumarang tabang kaateh langik nan binuang masuak ka paruik bumi di gunuang rajo”.

Arya tambah inok mandanga cito inyiaknyo. “dek lai juo iduik sampai kini paliaroan cindua mato itu anyo indak rela gala jo kehormatan urang minang di bagi bagi dek urang cadiak maota dan pandai manggili tuh. Akhianyo kudo gumarang nan badiam di ateh langik mangirim patuih ka tiruan ustano pagaruyuang nan dijadikan tampek marayoan pambarian gala tuh. Akhianyo tabaka lah tiruan ustano nan lah jadi berhala tuh. Kabau binuang indak lo nio katinggalan. Anyo nan badiam di paruik bumi gunuang rajo manggoyang dari dalam sahinggo bahoyak lah nagari tanah data dan sakitarnyo itu.” Inyiak manyudahi caritonyo.

Arya nan tadi penasaran bana mandango cito inyiaknyo sasudah mandanga kasudahan carito tuh langsuang ndak dapek manahan galaknyo lai. “Ha..ha…haa..nyiak nyiak..yo sabana santiang inyiak mangarang carito yiah..ndak kalah jo makmur hendrik doh nyiak tulih lah cito tuh elok elok bekoh arya jadikan komik”. Arya taruih galak galak gadang samantaro inyiak tampak taberang mancaliaknyo di galakan.

“eh ..eh waang kurang aja mah aden caritoan nan sabananyo waang galak an den, durako ang mah urang tuo ang paulahkan “. Inyiak langsuang maariak mamanggia anak jantannyo alias ayah si arya kamangadukan ulah si arya nan manggalakan citonyo. Arya langsuang maantian galaknyo takuik kanai berang dek ayahnyo.